1. Шинэ төрлийн COVID-19 вирусийн тархалттай холбоотой үүсээд буй нөхцөл байдлын улмаас эх орондоо түр хугацаанд буцах боломжгүй болж, АНУ-д байх визийн хугацаа нь дуусч байгаа монгол иргэд тус улсын харьяатын асуудал эрхэлсэн газар (USCIS)-т хандаж сунгалт хийлгэх боломжтой. Хүсэлтээ цахимаар илгээх бөгөөд тус байгууллага хүсэлтийг хүлээн авсанаас хойш шийдвэр гаргах хүртэл тухайн иргэний визийн статусын хоногт нөлөөлөхгүй.
Энэ оны 3 дугаар сарын 11-ний өдөр Монгол Улсаас НҮБ-ын дэргэд суугаа Байнгын төлөөлөгч В.Энхболд НҮБ-ын Хүүхдийн сан (UNICEF)-гийн Гүйцэтгэх захирал хатагтай Хэнриетта Фортой уулзалт хийв.
Уулзалтаар тогтвортой хөгжлийн зорилтуудыг хэрэгжүүлэх хүрээнд Монгол Улс НҮБ-ын Хүүхдийн сантай хамтран хөгжүүлж буй харилцаа, хамтын ажиллагаа, төслүүдийн талаар санал солилцов. Түүнчлэн Улаанбаатар хотноо энэ оны 5 дугаар сард болох Peacebook Forum-д НҮБ-ын Хүүхдийн сангийн Сайн дурын элч нараас оролцуулах боломжийн талаар ярилцав.
Нью-Йорк мужид шинэ төрлийн COVID-19 вирусын тархалт идэвхжиж, 2020 оны 3 дугаар сарын 6-ны байдлаар халдвар авсан хүний тоо 33 болж өсөв. Мөн нийт 2773 хүн сайн дураар тусгаарлагдаж, эмнэлэгийн хяналтад байна.
Иргэн Та хувийн болон гэр бүлийн гишүүдийнхээ хариуцлагыг өндөржүүлж, эрсдэлтэй газруудаар зорчихгүй, урьдчилан сэргийлэх арга хэмжээ ариутгалын арга хэмжээ тогтмол авахыг зөвлөж байна.
Вирусын халдвар авсан байж болзошгүй шинж тэмдэг илэрсэн тохиолдолд харьяа эмнэлэгтээ хандаж, яаралтай тусламж авна уу.
Энэ 3 дугаар сарын 6-ны өдөр Монгол Улсаас НҮБ-ын дэргэд суугаа Байнгын төлөөлөгч В.Энхболд Энэтхэг Улсын Байнгын төлөөлөгч Сьед Акбаруддинтай танилцах уулзалт хийв.
Уулзалтаар талууд Монгол, Энэтхэг Улс стратегийн түвшний харилцааг амжилттай хөгжүүлж байгаад сэтгэл хангалуун байгаагаа харилцан илэрхийлж, НҮБ болон түүний системийн байгууллагын хүрээнд хоёр улсын Байнгын төлөөлөгчийн газрууд нягт хамтран ажиллах талаар санал солилцож, харилцан ярилцав.
МОНГОЛ УЛСААС НҮБ-ЫН ДЭРГЭД СУУГАА
Энэ 3 дугаар сарын 4-5-нд болж буй НҮБ-ын Аюулгүйн Зөвлөлийн шинэчлэлийн асуудлаарх Засгийн газар хоорондын яриа хэлэлцээний хуралдаанд Монгол Улсаас НҮБ-ын дэргэд суугаа Байнгын төлөөлөгч В.Энхболд оролцож, үг хэллээ.
Энэ 3 дугаар сарын 3-ны өдөр Монгол Улсаас НҮБ-ын дэргэд суугаа Байнгын төлөөлөгч В.Энхболд энэ 2020 онд НҮБ-ын Далайд гарцгүй хөгжиж буй орнуудын бүлгийг даргалж буй Бүгд Найрамдах Казахстан Улсаас НҮБ-ын дэргэд суугаа Байнгын төлөөлөгч Кайрат Умаровтай танилцах уулзалт хийв.
Нью-Йорк хотын амбан захирагчийн газраас шинэ төрлийн COVID-19 вирусын анхны тохиолдол бүртгэгдсэнийг энэ 3 дугаар сарын 1-ний өдөр мэдэгдэв.
Вирусын халдвар авсан 30 гаруй насны эмэгтэй нь Иран Улсад зорчсон байсан бөгөөд одоогийн байдлаар гэртээ тусгаарлагдаж, эмчийн хяналтад байгаа аж.
Энэ оны 2 дугаар сарын 28-ны өдөр Нью-Йорк хотын амбан захирагчийн газраас тус хотод шинэ төрлийн COVID-19 вирусын тохиолдол бүртгэгдээгүй байгааг онцлоод дэлхий дахинд үүсээд буй нөхцөл байдалтай холбогдуулж хүнээс хүнд дамжих эрсдэлд Эрүүл мэндийн газар бэлтгэж, урьдчилан сэргийлэх арга хэмжээг авах, бүх нийтийг сэрэмжлүүлэх, эрсдэлийн үнэлгээ хийж байгаа талаар мэдэгдэв.
Шинэ коронавирусын COVID-19 тархалтаас урьдчилан сэргийлэх, эрсдлийг бууруулах хүрээнд Улсын онцгой комисс 3 дугаар сарын 1-ний өдөр хуралдаж, Улаанбаатар-Эрхүү-Улаанбаатар, Улаанбаатар-Улаан-Үд-Улаанбаатар чиглэлийн олон улсын нислэгийг 3 дугаар сарын 11-ний өдрийг дуустал түр зогсоох, халдварын тохиолдол эрс нэмэгдэж буй Иран Улсад сүүлийн 14 хоногийн хугацаанд зорчсон гадаадын иргэдийг түр хугацаагаар Монгол Улсын хилээр нэвтрүүлэхгүй байхаар шийдвэрлэсэн.
Энэ 2020 оны 2 дугаар сарын 20-ны өдөр Монгол Улсаас НҮБ-ын дэргэд суух Байнгын төлөөлөгч В.Энхболд НҮБ-ын Ерөнхий нарийн бичгийн дарга Антонио Гутеррест итгэмжлэх захидлаа гардуулж, Монгол Улс, НҮБ-ын харилцаа, хамтын ажиллагааны талаар санал солилцлоо.
