महिला सम्बन्धी चौथो विश्व सम्मेलनको पच्चिसौं वार्षिकोत्सव (बेइजिङ +२५) को अवसरमा आयोजित उच्चस्तरीय बैठकमा नेपालका सम्माननीय राष्ट्रपति
श्रीमती विद्यादेवी भण्डारीज्यूको सम्बोधन
न्यूर्योक, १ अक्टोबर २०२०
मूल नारा: "सबै महिला, किशोरी तथा बालिकाहरूलार्इ सशक्त बनार्इ लैङ्गिक समानताको गति तीब्र बनाऔं"
अध्यक्ष महोदय,
संयुक्त राष्ट्र संघका महामहिम महासचिव ,
विशिष्ट महानुभावहरु ।
महिलासम्बन्धी चौथो विश्व सम्मेलनको पच्चीसौं वार्षिकोत्सवको अवसरमा यो उच्चस्तरीय बैठक आयोजना गर्नुभएकोमा म अध्यक्ष महोदय प्रति हार्दिक धन्यवाद् व्यक्त गर्दछु ।
बेइजिङ घोषणापत्र तथा कार्ययोजनाले महिला, किशोरी तथा बालिकाहरूको समानता र सशक्तिकरणका लागि रुपान्तरणकारी खाका प्रदान गरेको छ ।
बेइजिङ घोषणापत्रमा अन्तरनिहित सरोकारका बाह्र क्षेत्रहरूमा क्रमिक रूपमा प्रगति हुँदै गएको भएपनि ती प्रतिबद्धताहरु पूर्ण रुपमा हासिल हुन अझै समय लाग्ने छ। समाजमा संरचनागत खाडल तथा चुनौतिहरु कायमै छन् ।
कोभिड-१९ को महामारीले असमानताको जोखिमलार्इ अझ बढाएको छ । यो महामारीलार्इ हाम्रो प्रगतिको बाधक बन्न दिनु हुँदैन।
समयमै स्वास्थ्य स्याहार, खोपमा समान पहुँच एवम् महिला, किशोरी तथा बालिकाहरुको आर्थिक तथा सामाजिक आवश्यकताहरू सम्बोधन गर्न पुर्नलाभका योजना जरूरी छन् ।
'दिगो विकास कार्यसूची २०३०' को कार्यान्वयन दशक एवम् दिगो विकासको पाँचौं लक्ष्य प्राप्तिका लागि त यो एक महत्वपूर्ण परीक्षण नै हुनेछ ।
नेपाल सिड (CEDAW) लगायत मानव अधिकार सम्बन्धी प्रमुख दस्तावेजहरुको पक्षराष्ट्र रहेको छ। हामीले लैङ्गिक मुद्दालार्इ राष्ट्रिय विकासको अभिन्न अंगको रुपमा संविधान एवं कनुनमा नै व्यवस्थित गरेका छौं ।
लैङ्गिक हिंसा तथा विभेद अन्त्यका लागि लक्षित कार्यक्रम तथा कानुनको कार्यान्वयनलार्इ सुढृढ तुल्याएका छौं ।
भौगोलिक रुपम विकटतम् क्षेत्रमा रहेका प्रसव वेदनामा छटपटाएका गर्भवती र सुत्केरी महिलको जिवन रक्षाका लागि हवार्इ उद्धारको व्यवस्था गरिएको छ ।
वर्तमान समयमा नेपालमा संघ, प्रदेश र स्थानीय सरकारका कूल निर्वाचित पदमध्ये ४१ प्रतिशत र निजामती सेवामा २४ प्रतिशतभन्दा बढी महिला कार्यरत छन् भने ८३ प्रतिशत महिलाहरु श्रम बजारका विभिन्न क्षेत्रमा संलग्न छन् ।
यी उपलब्धिहरु लामो संघर्ष र निरन्तरको सृजनात्मक प्रयासबाट प्राप्त भएका हुन् ।
लैङ्गिक रुढीवादलार्इ हटाएर, परम्परादेखि चल्दै आएका असमानतालार्इ सच्याएर एवम् राष्ट्रिय, क्षेत्रीय तथा अन्तर्राष्ट्रिय स्तरमा हाम्रा प्रतिबद्धताहरू र तिनको कार्यान्वयन बीच समन्वय कायम गरेर बेइजीङ्ग घोषणापत्रका उद्देश्यहरु हासिल गर्न सकिनेछ ।
पूर्ण एवम् सारभूत समानता हासिल नभएसम्म महिला शसक्तिकरणको अभियान जारी रहनु पर्दछ ।
विभेदका अवशेषहरू निर्मूल पार्न र कार्यान्वयनमा रहेका कमजोरीलार्इ सुधार्न हामी प्रतिबद्ध रहेका छौं ।
महामहिमज्यूहरु,
अन्त्यमा, लैङ्गिक समानता जीवन र जगतको निरन्तरताको लागि अपरिहार्य र महत्वपूर्ण अधिकार हो भन्ने कुरामा म जोड दिन चाहन्छु ।
यो न्याय, शान्ति एवम् प्रगतिको एकमात्र मार्ग हो ।
आजको यो ऐतिहासिक क्षण महिलामा अन्तरनिहित सबै संभावनाहरु हासिल गर्ने मार्गमा रहेका अवरोध अन्त्यको संकल्प गर्ने अवसर पनि हो ।
धन्यवाद ।