НҮБ-ын ЕА-н 54 дүгээр чуулганы 54/115 тоот тогтоолын хүрээнд Тайландын Вант Улс болон Бүгд Найрамдах Ардчилсан Социалист Шри Ланка Улсын БТГ-аас жил бүрийн 5 дугаар сарын 1-ний өдөр “Бурхан багшийн дүйчин” өдрийн хүндэтгэлийн арга хэмжээг НҮБ-ын төв байранд зохион байгуулдаг.

Энэ жилийн арга хэмжээнд Бутан, Энэтхэг, Солонгос, Норвеги, Япон, Непал, Бангладеш, ОХУ, Унгар зэрэг нийт 19 улсын Элчин сайд, Байнгын төлөөлөгчид оролцож, эл өдрийг өөрийн улсад хэрхэн тэмдэглэн өнгөрүүлдэг талаар танилцуулж, үг хэлэв.

Монгол Улсаас Нэгдсэн Үндэстний Байгууллагын дэргэд суугаа Байнгын төлөөлөгчийн орлогч А.Гуамарал хэлсэн үгэндээ, Монголчууд “Бурхан багшийн дүйчин” өдрийг зуны эхэн сарын шинийн 15-нд тэмдэглэн өнгөрүүлдэг бөгөөд тухайн өдөр монголын бурхан шашны төв, бусад төрийн бус байгууллагууд хамтран шашны болон соёлын арга хэмжээг зохион байгуулдаг болохыг тэмдэглэв.